邦格岛之行4 - 痛苦之后有...（海鲜餐）

一轮鬼妹性感诱惑，海滩沙沙催促我地放好啲野，然后换返条游水裤去踏浪啦。然而，就喺准备出去的一瞬间，阿bear竟然发现肌肉佬将佢条四角游水裤穿成三角游水裤！哈哈！可能肌肉佬嘅PET PET真係太大啦。

话咁快，我地就冲到沙滩上了。第一个感觉係语助词：哇～蓝天白云～干净的沙滩～周围嘅靓女～一望无际嘅大海～轻轻吹拂嘅海风～仿佛为佐得到呢一刻，再贵都係值得嘅。我地揾佐个无人嘅小角落，四人有如包起呢部分嘅沙滩一样，忘却所有嘅烦恼压力，让海浪轻轻地打在我地嘅身上，背上，面上。某些时候，讲古佬，大番薯，阿BEAR，拿起一拳头嘅细沙，响肌肉佬攻击过去！然后佢就来个不忿嘅反攻！阿BEAR仲阴阴地，放沙落肌肉佬条裤到！真係爽啊～

然而，人嘅体力係有限嘅，纵使再好玩，都要休息。临走前拖多半个钟之后，时间大约三点半，我地就各自返房冲个靓凉，然后准备出去揾嘢食了。
我地计划係出去环岛，然后食埋晚餐先返。因为来回一次嘅的士费要成四十蚊，食完午餐就返来，晚餐又再出去似乎无乜意义，再加上酒店啲所谓食物既无特色可言，也唔符合我地嘅经济效益，所以，就有如此决定了。
倾好晒之后，去柜台召唤架的士，睇返个地图，就响TELUK NIPAH 出发啦！
可能时间唔靓啦！下午嘅四点前，大多数嘅嘢都收晒档，就连最为期待嘅烧鱿鱼都收佐档。就唯有无奈地求其咁揾个档口炒碟饭食顶住肚先。好野留返稍后先食。
二话不说，好快地又食完啦！然而仲有好多时间先到《高佬》开档嘅时候。趁有稍为空档，大家就建议不如去游下个岛。咁应该选乜嘢交通工具去游岛呢？
呢个时候交通执行员大番薯，出场啦。条友建议话踩单车。但係一向散弱嘅阿bear就话电单车似乎好啲啵。为佐说服阿BEAR，大番薯就拿起张地图话：“其实我地差个少少嘅弯位就到高佬，我地最多踩到果道就停啦！！加上我记得，係无乜斜啵嘅！”（以上言论并不代表阿BEAR，讲古佬同肌肉佬嘅立场）。
连声明都出埋，就知阿BEAR嘅接受係一个令大家赖嘢嘅开始。最后用佐一百蚊（rm60/4架/一日，rm40 DEPOSIT），好得戚咁开始踩单车了。

开始时，踩上单车嘅我地感觉住海风迎面吹来，係爽嘅。奈何爽嘅感觉一瞬间便消失了，因为考验来临了！眼前一个倾斜度十度嘅斜坡，迎面而来。紧接住另一上斜山坡再另一个山坡；之后係一轮爽快嘅落斜，讲古佬念念有词地话：而家落斜落得咁爽，等阵返就痛苦咯！确实，爽完之后，来到佐最高峰嘅考研，二十五度，上斜，踩单车！生活于城市，久未运动嘅我地又点会经得起如此严厉嘅考验啦！于是，好快就放弃踩上去了，索性落车用推嘅。

然而，突发事件不谋而合地随之而发生，大番薯嘅单车甩链了。于是肌肉佬就以一贯经验丰富嘅手势帮忙修理。奈何，沿路一架经过嘅电单车上有两个人竟然笑我地！唉。。确实係几好笑嘅。终于，我地来到第五个斜坡时，终于顶唔顺，决定放弃了！

有着放弃念头嘅我地，捻住还返架单车然后拿返啲DEPOSIT。然而，返去又係一大嘅考验！结果，于短短嘅路程，我地用佐大概一个钟嘅时间，完结佐我地嘅踩单车环节。仿佛好似估到一样，租单车俾我地条友还我地DEPOSIT之余，竟然仲只计我地租单车时间为一个钟，只收佐我地二十蚊。哩个係好人来！下次你地去可以搵佢租单车，就喺TELUK NIPAH烧鱿鱼嘅档口后面。当然，你要有足够嘅体力与气魄先好做呢种高难度运动。

累透了嘅我地，二话不说，索性租架的士向高佬出发。几经坡折之后，终于去到《高佬》了！然而，佢只开佐半边门。无计啦！我地就唯有喺佢旁边嘅土产店一边买手信，一边等佢开门啦。但係买完之后（男人买嘢好快嘅），《高佬》都依然是未开晒档。只见几个工人来去匆匆地唔知做紧乜。你问我做紧乜？係唔知做紧乜嘅！

唔理啦！一于坐低等。我地好唔客气咁就坐低了。不过，虽然未开锅，不过茶水部开佐，所以阿BEAR就提议整壶《香片》，边饮边等边捻叫乜食！

终于，终于都等到老板娘来点菜啦！首先，当然叫佢介绍我地招牌菜啦！最后，我地点佐以下嘅几样：《上汤啦啦》，《咸蛋蟹》，《招牌干煎虾》，《马来风光》。

基于唔想食饭，所以阿BEAR就提议叫碟炒米粉大家一齐食啦。然而，当老板娘正要离开之际，肌肉佬大声地讲佐句：唔该啤个饭我！’肌肉佬有着一贯要有饭配嘅食法，对我地来讲，呢个举动，并不出奇。

等佐大概十五分钟之后，上菜了。首先来佐个《上汤啦啦》。

《上汤啦啦》嘅香味唔算重， 摆于面前，佢只散发出淡淡嘅酒味。汤嘅感觉，有纪子吊出係一阵甜，然后就係啦啦本身嘅鲜，最后就係辣椒仔嘅一阵小辣。虽然佢嘅啦啦唔算大只，不过新鲜同埋处理得好好，无泥亦都无泥味。加上恰到好处嘅火候，令到煮出来嘅啦啦好爽口。

第一道菜上来之后，肌肉佬好无疑惑地话：唔该加多个大饭啦！一个饭都未开始食，就加多另外一个。真係好嘢！名副其实嘅饭桶！！

之后，就係炒米粉同埋《马来风光》啦！然而，炒米粉就只係普通嘅炒米粉，《马来风光》亦都同普通嘅无乜分别。所以喺呢道唔加以谈论。

紧接落来，就係呢个《招牌干煎虾》啦！开始时，我地觉得干煎虾应该都係咁上下，但係老板娘喺佢个名道加佐个招牌，我地捻应该係会有佢嘅特别。确实，佢嘅《招牌干煎虾》同其他嘅係有唔同。首先，佢嘅味道唔係以咸为主，入口嘅感觉，汁係甜嘅。感觉有点似XO酱。可能係厨师嘅功力所在，汁嘅味道唔会霸道，反而恰到好处；不但无抢掉虾本身嘅鲜味，反而为其添上另一种味道。一般嘅干煎虾，虾身都会干干，拆虾壳嘅时候都会零零散散咁脱落。但係，佢呢道嘅《招牌干煎虾》就无呢个情况了。

虾肉入口新鲜，有种弹牙嘅感觉，用力咬下会发出‘索索’嘅声响。然而，对我地来讲仍然有每种不住嘅地方，我地觉得，如果可以添加少许嘅辣味，咁就更加正啦！因为我地四个都係无辣不欢嘅。

到最后，就係我地最期待嘅《咸蛋蟹》。《咸蛋蟹》唔係咩特别嘅宋。几乎道道都识住，但係要煮得好食，係真係好考功夫。佢呢个《咸蛋蟹》同以往我地食过嘅有少许唔同。一般餐馆嘅《咸蛋蟹》，咸蛋浆都唔会粘到蟹身处；啲咸蛋反而散到成碟都係。然而佢呢个就唔同啦！

蟹身满是咸蛋酱，配上少许嘅辣椒仔同咖喱叶，带出一种芬香嘅感觉。小辣又唔会太咸。同埋值得一讲嘅係，蟹係以三份一嘅杀法上碟嘅，所以每人分到嘅都好大只。蟹嵌，蟹身同埋蟹脚係连埋嘅，无分开。蟹身嘅中间被切一半，蟹壳又係另一部分。所以总共分成佐三份，呢个就係三份一杀法啦！同样地，都係好新鲜！完全无霉嘅感觉。食佢嘅肉，就有种鲜甜嘅感觉。

终于，我地都满意地食饱了。而卖单嘅时候，确实有个惊喜。全餐有虾有蟹，都只係RM60。可惜嘅係佢嘅收条并无著名各样嘅菜式嘅价钱。所以无法告知大家啦。不过，出来玩，价钱只係第二个考虑因素。最紧要嘅仲係食物嘅味道。总结讲一句，《高佬》嘅嘢，係好食嘅！总算，喺单车事件嘅痛苦之后，有海鲜餐作为补偿，未算係坏事啊！因为人总係喺一轮痛苦后得到某啲嘢，先会觉得珍贵嘅。

到最后，要预告一下，下一篇！下一篇来到日落嘅时候了！日落之后，会有一场灾难！而呢场灾难嘅两名受害者係阿BEAR同埋讲古佬。而罪魁祸首竟然係肌肉佬！究竟係咩事呢？

请期待下一篇：邦格岛之行5 - 黄昏之后的灾难